BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-3, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 19-November-2003

XX
Hroðgar maþelode     helm scyldinga
ne frin þu æfter sælum     sorh is geniwod
denigea leodum      dead is æschere 1325
yrmenlafes     yldra broþor
min rúnwita    7 min rædbora
eaxlgestealla      ðonne we on orlege
hafelan weredon      þonne hniton feþan
eoferas cnysedan / (swy)[lc] [eorl] (s)colde  1330 159v
wesan <..> ærgod   swylc æsc(here) (wæs)
wearð him on heorote    to handbanan
wælgæst wæfre     ic ne wát hwæþer
atol æse wlanc    eftsiðas teah
fylle gefrægnod   heo þa fæhðe wræc 1335
þe þu gystran niht    gren(d)el cwealdest
þurh hæstne had    heardum clammum
forþan he to lange    leode mine
wanode 7 wyrde      he æt wige gecrang
ealdres scyldig      7 nu oþer cwom 1340
mihtig manscaða     wolde hyre mæg wrecan.
ge feor hafað      fæhðe gestæled
þæs þe þincean mæg    þegne monegum
se þe æfter sincgyfan    on sefan greoteþ
hreþerbealo hearde     nu seo hand ligeð 1345
se þe eow welhwylcra    wilna dohte.
ic þ londbuend     leode mine
selerædende      secgan hyrde
þ hie gesawon    swylce twegen
micle mearcstapan      moras healdan 1350
ellorgæstas      ðæra oðer wæs
þæs þe hie gewislicost    gewitan meahton
idese onlicnæs      oðer earmsceapen
on weres wæstmum    wræclastas / træd 160r
næfne he wæs mara    þonne ænig m(an) oðer 1355
þone on geardagum    grendel nem(don)
foldbuende     no hie fæder cunnon
hwæ(þer) him ænig wæs    ær acenned
dyrnra gasta     hie dygel lond
warigeað wulfhleoþu     windi(ge) næssas 1360
frecne fengelad      ðær fyrgenstream
under næssa genipu    niþer gewiteð
flod under foldan      nis þ feor heonon
milgemearces      þ se mere stan{d}eð
ofer þæm hongiað    hrí{mg}e bearwas 1365
wudu wyrtum fæst    wæter oferhelmað
þær mæg nihta gehwæm    niðwundor seon
fyr on flode     no þæs frod leofað
gumena bearna      þ þone grund wite
ðeah þe hæðstapa    hundum geswenced 1370
heorot hornum trum      holtwudu sece
feorran geflymed      ær he feorh seleð
aldor on ofre      ær he in wille
hafelan; {helan}   nis þ heoru stow.
þonon yðgeblond    up astigeð 1375
won to wolcnum      þonne wind styreþ
lað gewidru      oð þ lyft drysmaþ
roderas reotað      nu is se ræd gelang
eft æt / (þ)e anum     eard git ne const 160v
frecne stowe      (ðær) þu findan miht 1380
felasinnigne secg   (s)ec gif þu dyrre
ic þe þa fæhðe    feo leanige
ealdgestreonum      swa ic ær dyde
wund{un}golde       gyf þu on weg cymest.