BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-3, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 19-November-2003

XVIIII
Sigon þa to slæpe     sum sare angeald
æfenræste       swa him ful oft gelamp
siþðan goldsele    grendel (w)arode 1255
unriht æfnde       oþ þ ende becwom
swylt æfter synnum     þ gesyne wearþ   
widcuþ werum      þte wrecend þa gyt
lifde æfter laþum     lange þrage
æfter guðceare     grendles modor 1260
ides aglæcwif      yrmþe gemunde
se þe wæteregesan    wunian scolde
cealde streamas      siþðan camp {him} wearð
to ecgbanan    angan breþer
fæderenmæge      he þa fag gewat 1265
morþre gemearcod     / (ma)n(d)ream fleon 158r
westen warode      þ(anon woc) fela
geosceaftgasta      wæs þæra grend(el) sum
heorowearh hetelic      se æt heorote fand
wæccendne wer      wiges bidan 1270
þær him aglæca    ætgræpe wearð
hwæþre he gemunde    mægenes strenge
gimfæste gife     ðe him god sealde
7 him to anwaldan      are gelyfde
frofre 7 fultum      ðy he þone feon(d) ofercwom 1275
gehnægde helle gast     þa he hean gewát
dreame bedæled     deaþwíc seon
mancynnes feond      7 his modor þa gyt
gifre 7 galgmod      gegan wolde
sorhfulne sið sunu {d}eo{ð} wrecan 1280
com þa to heorote     ðær hring-dene
geond þ sæld swæfun     þa ðær sona wearð
edhwyrft eorlum      siþðan inne fealh
grendles modor      wæs se gryre læssa
efne swa micle      swa bið mægþa cræft 1285
wiggryre wifes      bewæpned men
þonne heoru bunden     hamere geþuren
sweord swate fah      swin ofer helme
ecgum/ (dyhttig)   andweard scireð. 158v
þa wæs on hea(lle)    (he)ardecg togen 1290
sweord ofer setlum      sidrand manig
hafen handa fæst     helm ne gemunde
byrnan side      þa hine se (br)oga angeat
heo wæs on ofste     wolde ut þanon
feore beorgan      þa heo onfunden wæs 1295
hraðe heo æþelinga    anne hæfde
fæste befangen     þa heo to fenne gang
se wæs hroþgare    hæleþa (l)eofost
on gesiðes hád      be sæm tweonum
rice randwiga      þone ðe heo on ræste abreat 1300
blædfæstne beorn     næs beowulf ðær.
ac wæs oþer in   ær geteohhod
æfter maþðumgife.    mærum geate
hream wearð in heorote     heo under heolfre genam
cuþe folme      cearu wæs geniwod 1305
geworden in wicun      ne wæs þ gewrixle til
þ hie on ba healfa    bicgan scoldon.
freonda feorum      þa wæs frod cyning.
hár hilderinc    on hreon/ (mo)de 159r
syðþan he aldorþegn    unly(figendne) 1310
þone deorestan    deadne wisse.
hra(þe wæs) to bure    beowulf fetod
sigoreadig secg      samod ærdæge
eode eorla sum      æþele cempa
self mid gesiðum    þær se snot(e)ra bád. 1315
hwæþre him alfwalda æf(re) wille
æfter weaspelle    wyrpe gefremman
gang ða æfter flore    fyrdwyrðe man
mid his handscale      healwudu dynede
þ he þone wisan    wordum hnæg(de) 1320
frean ingwina      frægn gif him wære
æfter neodlaðu    niht getæse.